# 20040620唱好香港讚盡你我_李曾超人食腦食力食字


> 2004-06-20

較早前，名嘴風波浪接浪，傳媒風雨飄搖。封咪、收口、閉嘴之聲不絕於耳，當事人煩，局外大眾亦難獲半絲清靜。倒是時候尋找點點耳福，追溯不絕聽覺快感。六二八，諧音「路易發」，意頭大吉，宜開咪。港台新節目《你真超人》主持李力持、曾華倩齊齊唱好香港，讚盡你我……

<p style="color:#43676b">記：記者</p>

<p style="color:#1c305c">曾：曾華倩</p>

<p style="color:#595857">李：李力持</p>

<p style="color:#43676b">記：「你真超人」呢幾個字會令你地有何聯想？</p>

<p style="color:#1c305c">曾：我會諗到，香港係一片福地，呢度冇戰爭、冇饑荒，雖然近幾年香港唔係咁好，但人人都積極面對逆境，尋求出路，大家都係超人，去發揮自己所長助人助己。</p>

<p style="color:#595857">李：咦，呢個名玩「食字」喎！我姓李佢姓曾，咁咪係「李曾超人」！又有少少似西餅牌子……講笑咋！其實我會諗到去讚應讚的人，睇返外面，大家鬧人、互鬧好易，主動去讚人反而少，所以，「你真超人」響我心目中係講值得讚頌的同事，方式係由讚出發，但遇到要彈的事當然亦有特別呈現手法啦，大家聽過就知！</p>

<p style="color:#43676b">記：想藉呢個節目做到乜野效果？</p>

<p style="color:#1c305c">曾：我認為「HAPPY」係佢個最終目的，但唔係言之有物果種。其實呢一刻香港人最需要歡笑同放鬆，呢個節目的時段響臨訓之前，希望大家聽完有種RELAX的感覺，唔駛為好多身邊事憂慮，實行訓返覺甜的！</p>

<p style="color:#595857">李：我想呢個節目唔單止做到「有人聽」，而係「好多人聽」，並發揮到節目中所提倡的正面思想。比如話，做點化解到人地拗撬的東西。又或者舉個例，廣播道有個身世可憐的流浪漢，我地會響節目度講個現況，希望有心人或有關部門去幫手……</p>

<p style="color:#43676b">記：你地覺得彼此「超人」響邊度？</p>

<p style="color:#1c305c">曾：我十幾年前同大力首次合作，覺得佢「拍野都幾得喎！」，可以話係「有Ｄ野！」，嗯……即係個腦轉數快有諗頭喇，仲有佢幾易相處，雖然佢唔係靚仔，仲有少少咸濕，哈哈，但係有腦嘛！（李：嘩！你講野有返少少技巧好卦……）</p>

<p style="color:#595857">李：我十多年前過TVB都係為左兩個人咋！一個係藍潔瑛，另一個咪就係佢囉！所以真係覺得佢係「超人一等」的當家花旦，其實我覺得佢果種夠晒真性情、毫無保留的笑聲最正最超人，以為佢做左媽咪會收返Ｄ，但佢仲「變本加厲，大癲大肺」，繼續以笑會友，呢份「真」確係好突出，唔係人人有。</p>

<p style="color:#43676b">記：你地個節目會觸及社會各事，會唔會自訂規條界線以免踩過界遭封嘴？</p>

<p style="color:#1c305c">曾：我從來都唔會踩過界，所以唔擔心，不過講就咁講，雖然政治的事我唔識，亦只係一介女流，但響適當時候又會做超人挺身而出，冇理由有Ｄ野應該要出聲又忍住忍住，我諗會睇返當日的MOOD，冇話自己制止左自己先。呢，阿導演佢仲勁，會著住超人衫主持節目，幫大家搵公道！</p>

<p style="color:#595857">李：我冇所謂架，你肯著咪一齊著囉！我專踩過界，但事後又唔認數，好多傳媒都知架啦！哈哈，認真講句，我大大話話冇開咪三年喇，唉！今次個節目時段好，又一、二、五台聯播，我一定有乜就講晒出唻，唔會就住就住，可以保證係無所不及，希望做出個影響力！</p>

<p style="color:#43676b">記：可唔可以透露下實質話題有乜？</p>

<p style="color:#1c305c">曾：其實會睇返當時社會有乜野事發生而定，話題可以係任何野，主力係輕鬆開心，但係見到激氣野亦會講，例如我見到街上面有貨車、保姆車開車開到舞龍咁，又或者有部分工人唔盡責，連小朋友過馬路都唔拖住，自己顧住講電話……呢類事件都會擺出唻傾。</p>

<p style="color:#595857">李：華倩已經講左部分方面，另外我地亦會用父母同男女身分去講野，佢有個仔我有個女，可以同大家分享心得。我作為「麻甩佬」可以講最新最抵AV器材呀、電腦呀、腳底按摩呀咁；而華倩仍作為一個靚媽咪呢，講KEEPFIT扮靚、格價、娛樂就一定難唔到佢……</p>

<p style="color:#43676b">記：今次雙方都可算係重聚，預計會……</p>

<p style="color:#1c305c">曾：我預計會有火花架，雖然大家有一輪冇接觸，但係一傾返偈就真係停唔到，我份人幾百搭下，今次搭多多計的導演，一定會係一個好開始。</p>

<p style="color:#595857">李：嘩！我直情肯定會有火花添啦！因為早有前科呀……我記得好耐之前同佢拍野，有個鏡頭我想重拍，但佢又話約左人要走，哈哈，咁自此大家就「心裡有火」喇！其實呢，我只係想藉此話大家經歷有共通點，今次攜手合作，默契會有，咁就自然可以做到正野出街啦！嬲？得啖笑咋！</p>

<p style="color:#43676b">記：咁耐冇見，覺得對方有何改變？</p>

<p style="color:#1c305c">曾：佢冇改變，都係咁！我就……靚左！哈哈，講真，佢成熟左穩重左，以前係叻人，而家仲叻，我幾欣賞佢！</p>

<p style="color:#595857">李：噢，滄海桑田，十年人事幾番新，諗返，當初追佢又唔理我，而家佢已經係媽咪喇，都幾傷感！真話，時間令大家都成長左，我而家會覺得佢係一個可以信任，可以放心去傾野的拍檔，今次大家踫頭，都算係緣份。</p>

<p style="color:#43676b">記：籌備過程之中有冇難忘事呢？</p>

<p style="color:#1c305c">曾／李：錄主題曲個過程好開心同好搞笑，除左段主歌外，我地響過場度自由發揮，講下野，之前大家都冇夾過，但又可以好似踢波咁你一腳我一腳交來交去，一言一語居然又接到喎！其中一段大力仲整左個肉緊樣出唻，笑壞人！</p>

<p style="color:#43676b">記：六月廿八首播，好意頭呀！</p>

<p style="color:#595857">李：其實係港台揀，就正星期一開騷嘛。我諗唔係特登話LUCKY關係……唔通揀七一咩，咁有少少尷尬啦！</p>

###### 後記

未開騷前先精采確實冇錯！靚媽咪曾華倩樣子仍然索到無倫，再加陣陣開朗笑聲，就如大力所說－－正！另外，「美孚機神」李力持亦都妙語連珠，一時說雙方早有恩怨，復提當年過檔TVB一大原因係為了對方，時真時假互講互動，絕對饒有興味……咪後爽事現時大家已一窺，咪前風流就要到時開著大家的收音機，觀摩觀摩！