# 20110130華倩chok聲冧仔君如窺全相

> 東方日報 2011-01-30 文：影視組　攝：沈健程　場地：the mira HONGKONG

![曾華倩和吳君如](https://file.qianying.zone/230728-a0b416.png)

因為一場舊同學商天娥的婚宴，造就一班「失散」多時的電視訓練班舊同學重聚，廿八年後個個「學業有成」，其中更包括影帝和影后，如劉青雲、吳君如和劉嘉玲，而曾華倩、陶大宇及吳啟華等亦在演藝界中獨當一面。華倩和君如當年在班上感情之好堪稱「金蘭姊妹」，現今兩女雖已各為人母，但是次敍舊訪問竟句句精彩，君如大爆華倩拍拖冧招，華倩即反擊被「鹹濕妹」君如睇全相！

曾 = 曾華倩 吳 = 吳君如

###### 爆攞膽戀事

曾：吳同學，我哋訓練班出嚟keep到依家（感情）算係咁啦？

吳：嘩……訓練班，戰前嘢嘞，我都淡忘！

曾：唔緊要啦！邊呃到人呀，呃自己架啫！

吳：真係廿八年咩？咁我咪廿八歲囉！

曾：嗰時我哋感情最好，我同你玩最多！

吳：我仲去你大埔屋企瞓，你張床好細，我仲要瞓地下，你就瞓床！

曾：吓！乜我咁識招呼人呀！哈哈哈哈……（面露尷尬）

吳：咪係囉！過門都係客嘛！我仲記得你床頭有個藍色電話，成日就煲電話粥，以前冇call waiting，你呀，講到死唔斷氣，chok起把聲話「點呀……」好攞膽！把聲chok到懶sweet咁！嗰個邊個？你話呢！哈哈哈哈！

曾：喂……唔好講呢啲好喎！咩邊個呀！（其實指梁朝偉）

吳：乜你唔係叫我嚟爆你啲嘢咩？（說時一臉得戚）

###### 爆「鹹濕」

曾：講番你啦，一個鹹濕妹！

吳：我唔係鹹濕，我要澄清只係對人體奧秘好感興趣，點解劉嘉玲（同期訓練班）咁大（咪咪），曾華倩咁細，可能我哋讀訓練班時未發育完成，啲蘇州姑娘咁大嘅？蘇州啲水好飲啲？可能就係咁，我哋發育不良！（華倩被拉落水不是味兒）

曾：去你屋企玩呀，叫我入去沖涼唔好鎖門，我又驚你屋企人入嚟，咪淨係拉埋浴簾囉，點知你突然喺我後面出現，就係咁……

吳：（若無其事地）突然間見到我係咪好開心呢！我都係出於好奇啫！

曾：你讀女校就open啫，我讀男女校，好保守架嘛，搞到我幾尷尬，睇晒我喎……

吳：你仲記唔記得我哋年卅晚仲買碌柚葉浸浴，又買新紅底褲？原來把鬼嘅，蘇民峰話我忌紅！我真係好鍾意請啲同學返屋企沖涼，我「集郵」嘛，哈哈……

###### 爆男女關係

吳：我哋訓練班好嚴，唔畀搞男女關係，都係Locker room啫，做到咩出嚟吖，班上最早拍拖係你囉……（又指梁朝偉）

曾：你呢……話我！

吳：我都未畢業，佢（指杜德偉）係之後嘅，唉！我唔記嘞！講番你啦！

曾：我哋好鍾意出去蒲Disco，尤其嗰時好興Ladies Night，我哋成日都蒲到兩、三點，有時玩到個場開燈！

吳：劉芳剛老師知道我哋出去玩，要問我哋，但又唔畀我哋夾口供，要我哋一個一個入房講！

曾：好彩嗰時冇狗仔隊咋……

吳：你都覺得好淫亂呢……哈哈……

曾：我唔係呀，唔知你喇！

###### 爆妒忌

吳：我哋嗰時都好多機會，大家都唔同路線，冇得妒忌，啱啱訓練班出嚟，有咩演技吖……白紙一張，最記得自己一出嚟就做舞女角色，又做過劉江情婦，仲有床戲架，我好驚，自己又「一碌葛」咁！拍咗兩、三年就入咗EYT，大家條路都好唔同，自己又同另一班人玩，不過我哋都keep住聯絡，邊個冇工開都知！

曾：我又好羨慕佢哋，我當年成日喺班房等，有啲節目要出去拍賣旗，我咪幫手！

吳：當年你個樣咁細，做童星就得！後尾你都做花旦啦！不過，我覺得你最大成就係做一個廿四孝媽媽！你真係好大犧牲，好有耐性，我就自問比唔上，如果做媽媽十分係滿分，我只係得五分，你就十分！

曾：你謙啫，你記唔記得嗰時我忙湊仔，你打嚟叫我出街，我話唔得，你即刻唔鍾意，仲話細路仔天生天養吖？

吳：所以咪話你有耐性，最攰唔係照顧仔女起居飲食，係陪佢玩呀，到我有個女後，當我忙開工，我即刻將自己閉關兩、三個星期，叫所有家人都唔好搵我，點知個女又得喎，可能我個女讀國際學校，夠獨立呀。我又想問你嘞……如果你個仔帶個女朋友返嚟你會點，使唔使過你嗰關？

曾：我又冇咁長遠，個仔都係十二歲啫，不過我都係當佢哋係朋友咁相處，呢個年代係咁啦。你淨係生個女？仲會唔會再追呢？

吳：諗o架……不過都係順天意，或者收養囉！其實我哋都契咗對方嗰件……你就契我個女，我就契你個仔，咪等如大家都有仔有女，我都好滿足嘞！呢個年代仲想點呀！哈哈……

###### 姊妹契約

華倩、君如各有子女，二人感情要好，故此華倩生了兒子後，便順理成章給君如上契，而君如生女後，亦將女兒上契予華倩。今次兩位契媽做訪問，「華倩仔」雖沒有造訪，但「君如女」陳是知卻有來探班。最愛紫色的是知一身紫色打扮，佩戴紫色蝴蝶結，相當可愛！契媽華倩見到契女很興奮，邊逗她玩邊送上發光鴨仔玩具，是知興奮對着媽咪的同時卻受到契媽的「誘惑」，令四歲人仔「忙爆」！

{{< galleryim >}}

<galleryim>
  <img src="https://file.qianying.zone/230728-345c8a.png"  alt="陶大宇笑君如當年化妝似《少林足球》的趙薇，君如解畫：「我當年呢個妝係『埃及妖后』！">
  <img src="https://file.qianying.zone/230728-c24391.png" alt="華倩與梁朝偉當年帥哥美女情侶檔拍劇，深入民心">
  <img src="https://file.qianying.zone/230728-0b76c6.png"  alt="君如曾與杜德偉拍拖，可惜最後分手收場">
  <img src="https://file.qianying.zone/230728-8bcc21.png" alt="華倩和君如">
  <img src="https://file.qianying.zone/230728-caf8d5.png"  alt="華倩和君如">
  <img src="https://file.qianying.zone/230728-e55cfb.png" alt="當年劉嘉玲（左起）、君如及華倩十分老友">
  <img src="https://file.qianying.zone/230728-39bb4f.png" alt="陶大宇、華倩和君如母女感情要好">
  <img src="https://file.qianying.zone/230728-bb8e5d.png"  alt="「失散」多時的電視訓練班舊同學在商天娥的婚宴上重聚">
  <img src="https://file.qianying.zone/230728-04a6d4.png" alt="華倩為表情多多的是知拍照">
</galleryim>