# 20161108陪仔仔四出比賽華倩自嘲年紀大頭都暈

> on.cc東網 | 繽FUN星網 2016年11月08日(二)

![Margie](https://file.qianying.zone/230726-d3d1af.png)

曾華倩的兒子林浩賢昨日於港九區學界D1游泳決賽中，勇奪50米自由泳冠軍，同時刷新兩項香港學界紀錄。Martin致謝辭時，多謝媽咪一直以來的付出，並每日凌晨不辭勞苦載他練水；她又直言今次勝出，為中學生涯畫上完美句號。

華倩接受《東網》訪問時坦言很開心，問到會否跟兒子吃飯慶祝時，她謂：「佢大個嘞！都出咗去同啲同學仔慶祝。」華倩指這兩年兒子參與了多個比賽，而這位廿四孝媽媽更每次都於現場陪伴，與兒子齊齊「出賽 」。華倩說：「真係飛到頭都暈，之前去咗好多地方，泰國、馬來西亞同印尼。上年去印尼學界比賽，嗰次100米自由式嘅成績都好好，現場仲有升區旗，我真係覺得好感動。通常佢去外地比賽，我都會參與。」

##### 讚兒子超水準

華倩亦開心表示在剛剛過去的九月，兒子去了廣州多個地方作學界比賽，更攞了兩個金牌，成績斐然。談到昨日的比賽，華倩坦言起初都怕兒子之前出賽太多，體力透支：「唔expect佢好好，盡量啦！不過佢今日（尋日）嘅表現比我想像中係超水準，今年係佢中學最後一年，總算完美畫上句號。」

華倩又透露，兒子快要面對DSE考試，故稍後都要「停水」，放多些時間於學業上，她謂：「月中佢要去日本比賽，因為有個錦標賽，之後就真係要停水，冇辦法，個個都係咁，不過我覺得個仔完全唔落水就唔會，有時間嘅話都會去游水放鬆吓！」

##### 後生仔唔怕辛苦

談到兒子操水多年，華倩坦言囝囝很享受當中的過程，更不怕辛苦，她謂：「只要係鍾意，係唔會覺辛苦嘅，一班隊友一齊練水係好開心嘅。（成日咁操法做阿媽唔肉赤？）後生仔係應該鍛煉吓嘅，不過阿媽就一把年紀，辛苦啲，佢哋後生仔一個回魂覺就返番嚟！作為媽媽嘅我一定會支持。」

現年51歲嘅曾華倩，離婚近14年一直保持單身，期間只跟過無綫小生馬國明傳緋聞，不過戀聞最終不了了之。而1983年入讀無綫藝員訓練班的華倩，憑藉甜美外表很快便備受無綫力捧成為當家花旦，輾轉至今33年。而值得一提的是，在這33年間，華倩的樣子依然十年如一日，即使年屆半百亦十分省鏡，好似唔識老一樣！

{{< galleryim >}}

<galleryim>
    <img src="https://file.qianying.zone/230726-d3d1af.png">
    <img src="https://file.qianying.zone/230726-059069.png">
    <img src="https://file.qianying.zone/230727-624c53.png">
    <img src="https://file.qianying.zone/230727-ee4278.png">
    <img src="https://file.qianying.zone/230727-6fbbde.png">
    <img src="https://file.qianying.zone/230727-270e0f.png">
    <img src="https://file.qianying.zone/230727-52a2f5.png">
    <img src="https://file.qianying.zone/230727-2f79bd.png">
</galleryim>