# 20210813串椒3姊妹繽FUN星網揭不務正業掛住踢波譚詠麟曼聯忠粉被小惠激親

> 東方日報 2021年8月13日(五)

「樂壇校長」譚詠麟大駕光臨繽FUN星網節目《串椒3姊妹》，主持梅小惠、曾華倩及江欣燕為投其所好，即換上曼聯波衫，不過小惠卻倒拗撐曼城。他自爆當年踢波瘋狂史，曾不惜「犧牲」本業，在連開38場演唱會的情況下仍堅持每日開波曬到變黑炭頭，甚至走勻各區軍營「挑機」，絕對是被唱歌事業耽誤的足球猛將！

譚詠麟（阿倫）貴為明星足球隊領隊兼主席，三句不離波經，加上明日英超開鑼，乘機暢所欲言。當中3姊妹笑言睇波只為睇靚仔，阿倫就表示圈中有不少女星受老公影響而愛上足球，包括李克勤老婆盧淑儀及陳百祥老婆黃杏秀等。講到他是曼聯的忠實粉絲，梅小惠卻唱反調指睇好曼城，令他表現激動，立刻為愛隊護航：「曼聯慢慢開始打到個風格出嚟，如果佢肯花啲錢，多一個後防同中場，咁就OK啦！」

###### 歌詞牌如平安鐘

數到其瘋狂踢波史，他自爆昔日試過包旅遊巴士，載着球隊出征各區軍營，一日踢足三場，最瘋狂時連演唱會也不顧：「有年我連續開38場演唱會，日頭我都照去踢波，曬到完全黑晒，上台前化妝師點同我補粉都搞唔掂，仲叫我唔好咁啦，佢都係打份工啫。」

提到開演唱會，眾女笑指阿倫是忘記歌詞的始祖，要靠歌詞牌提示，阿倫就澄清：「其實演唱會係要投入，嗰個牌咁大個係畀山頂嘅朋友睇。我唔係個普通歌手，我有過千隻歌，有300隻以上係金曲，有時某啲少唱啲嘅，整啲字喺度，同平安鐘一樣，需要時就撳吓，唔需要咪由佢擺喺度。」

###### 校長之名由來

梅小惠續爆料指當年阿倫開騷前，仍堅持向正排隊入場的觀眾謝票，大讚他愛錫歌迷。阿倫又指原來「校長」稱號與演唱會有關：「其實係傳媒改嘅，嗰陣我每年都開紅館騷，佢哋話個個入嚟都識唱我啲歌，好似唱校歌咁，所以叫我譚校長。」

下一集就有同樣分量十足的影帝任達華作為壓軸嘉賓，記住收看於8月20日在繽FUN星網播出的《串椒3姊妹》。

來到「姊妹3揀1」環節，阿倫好友曾志偉17年前亮相《串》時，選擇曾華倩做私人秘書、江欣燕做私家看護、梅小惠做女兒，今次輪到阿倫重新選擇，答案截然不同！他指秘書非小惠莫屬，因為她做事妥當、具組織能力，看護則會選曾華倩，豈料她被質疑做事烏龍，容易打錯針，阿倫卻認為她夠細心，小惠即幫口：「佢兩個阿哥都係醫生，一定Book到時間！」他續指認為江欣燕是孝順乖女，對爸爸一定很好。

{{< galleryim >}}

<galleryim>
  <img src="https://file.qianying.zone/230820-cb25fe.png" alt="Margie">
  <img src="https://file.qianying.zone/230820-685957.png" alt="Margie">
  <img src="https://file.qianying.zone/230818-0ad318.png" alt="Margie">
  <img src="https://file.qianying.zone/230818-a46914.png" alt="Margie">
  <img src="https://file.qianying.zone/230818-eba4d3.png" alt="Margie">
  <img src="https://file.qianying.zone/230818-e28bb5.png" alt="Margie">
  <img src="https://file.qianying.zone/230818-6ef8ca.png" alt="Margie">
  <img src="https://file.qianying.zone/230820-a43f07.png" alt="Margie">
  <img src="https://file.qianying.zone/230820-487085.png" alt="Margie">
  <img src="https://file.qianying.zone/230820-891f7b.png" alt="Margie">
  <img src="https://file.qianying.zone/230820-d8c7b7.png" alt="Margie">
  <img src="https://file.qianying.zone/230820-db6f9a.png" alt="Margie">
</galleryim>