20210716串椒3姊妹繽FUN星網男神越級電暈姐姐周柏豪緣分早種被梅小惠奪第一次

東方日報 2021年7月16日(五)

演暖男Oppa入晒屋的男神周柏豪，突襲繽FUN星網節目《串椒3姊妹》，使盡渾身解數電暈「50+」姐姐梅小惠、曾華倩及江欣燕，他更自爆與梅小惠「姻緣」早注定，對方堪稱他生命中的「第一」；又曾獲曾華倩帶挈賺錢，當正她是貴人，口甜舌滑冧爆姐姐們！雖然氹女有一手，但他笑言始終難敵「前世情人」，被囡囡Sonya食住！

周柏豪憑劇集《多功能老婆》中暖男「浩田」一角冧盡萬千女生，同樣被迷倒的3姊妹為支持男神，特意自費買入其品牌的顏色Tee，着住錄製節目，令柏豪相當驚喜：「又感動又唔好意思！」並隨即送上品牌吉祥物、在《多》劇大受歡迎的「阿肥」貓星俠絕版公仔作回禮，非常有心。

柏豪雖然已為人父，但36歲的他面對一班「姐姐」即變「小鮮肉」，當中大他19年的曾華倩笑說：「我主持《430穿梭機》嗰陣，你都未出世呀！」但柏豪揚言對3位「姐姐」非常熟悉，當中與梅小惠最有淵緣，因早在童年已有一面之緣，他說：「細個有次去尖沙咀，媽咪拖住我，你就正面行過嚟，媽咪話你係我第一個見嘅明星，嗰時我大約4、5歲。」梅小惠即說：「重點係你媽咪當我係明星！」又搞笑說：「原來小惠姐姐喺你細細個已經種下我哋嘅姻緣！」柏豪又指入行初期曾與曾華倩合作，更被帶挈贏大錢：「我入行做過一個投資嘅綜藝節目，嗰陣我哋一組，贏咗成4萬幾蚊！」

被「前世情人」Head住

談及演暖男入型入格，現實中的他同樣是暖男一名，入行前已跟老婆拍拖的他，坦言老婆從未因其緋聞擔心：「反而係佢畀信心我，我做任何嘢，佢都會支持我。」又透露與老婆是在時裝店偶遇一見鍾情，後來在交友網相認，才發現是鄰居，非常有緣！雖然老婆給予無限空間，但他笑指女兒出世後已「還清」：「依家冇嘢代替到我個女，所有嘢都淨係諗佢，我老婆15年嚟都冇治過我，終於有個人治到我！」

繼暖男柏豪後，下一集就有「不老男神」張智霖殺到，記住留意7月23日於繽FUN星網播出的《串椒3姊妹》！

經典環節「姊妹3揀1」，從3姊妹中分別挑選女朋友、老婆及一世朋友，柏豪首選曾華倩做老婆，全因對方夠霸氣：「我覺得佢會治到我！佢感覺係有威嚴，我需要有個人去勒住我，我甘心！」氹得華倩心花怒放說：「最重要呢樣，佢甘心先係重點！」而梅小惠適合做一世朋友，因她能將快樂帶給身邊所有人；江欣燕則是女朋友之選，他說：「有甜蜜嘅感覺，好Sweet！」又指小時候經常看對方扮菲傭Maria，梅小惠即笑問：「咁需唔需要佢做你女友嘅時候，成日要搽黑塊面？」他即說：「都好，有時喺屋企自己玩吓！」