20170921梅小惠撐老友有禮貌_曾華倩 人在做天在看

東方日報 2017年9月21日 (四)

對讀者爆料指曾華倩在機場「發爛渣」一事，好友梅小惠予以力撐，並讚華倩不化妝已是一個美人，細細聲已很搶鏡，今次只是大聲了少許、高了兩度，才被誤會她發惡。

小惠說：「華倩一向係穩陣嘅人，對這位千年情人（指其兒子）極度迷戀，所以將身上所有嘢都畀晒佢，今次畀多咗少少，就係個銀包囉！呢宗事件當係經一事長一智，相信華倩係有禮貌嘅人，女人仔遇到呢啲咁嘅情況先會咁焦急，大家對佢多一份包容啦！」華倩在小惠心中一向是大姐姐會以身作則，小惠笑指對方今次的事例，可給自己一個「樣辦」，日後遇到也知道如何處理。

曾華倩：人在做天在看

藝人曾華倩向來支持兒子林浩賢出戰游泳比賽，昨日囝囝要到外地進行游泳比賽，華倩晨早送他到機場，豈料囝囝入了禁區後15分鐘，華倩才發現自己的銀包留於囝囝袋裏，雖然二人仍聯絡到，但囝囝已過關，拿不到銀包給她，故當時華倩相當焦急，情急下更向地勤、機場工作人員及警方求助，但最後華倩的銀包亦未能取回。

事後有人於社交網貼文，指華倩於機場周圍發爛渣要取回銀包，貼文更夾雜粗言及攻擊性字眼。不過，網友看完後大部分都力撐華倩，留言指：「情急之下咁都好正常。」亦有人體諒謂：「一個女人仔，個銀包入面又身份證、信用卡、八達通，分分鐘連車都無法開離停車場，大人有大量啦！」但貼文者不收手，再留言說：「好簡單，搞到我遲收工……」令人估計貼文者是機場工作人員。

澄清只係焦急

記者昨日聯絡華倩，她否認於機場「發爛渣」，她說：「個仔入咗禁區15分鐘後，先發現銀包留咗喺囝囝度，我曾經向地勤人員求助，試吓有乜嘢方法可以拎番銀包，當時都有地勤職員想幫我，不過另一個高級職員就出嚟話唔得！冇呢啲服務，如果要拎番出嚟，機票會取消，佢嘅態度好差、黑晒面，根本就冇嘗試諗辦法幫忙。（網民話你命令地勤職員？）我冇發爛渣，人在做天在看，自己當時只係焦急，因為我未遇過呢個情況，當時唔知點，相信每個遇上呢啲事都係咁，今時今日呢個服務態度真係唔得，其實佢係咪要自我檢討吓呢！」

華倩表示曾向警察及機場職員求助，獲有關方面友善回覆，她說：「有警察試過幫我聯絡禁區嘅同事，但佢哋回應係唔可以咁做，警察態度係好友善嘅，而協助出境嘅機場職員都好幫手，嘗試搵方法幫我，雖然最終銀包攞唔番，但我都好多謝佢哋。」

失魂事件多籮籮

問到華倩會否對該航空公司職員作出投訴時，她說：「唔啦！之後我都約咗個朋友喺機場飲嘢，我都話算喇！咪等個仔一星期後返嚟先囉！」華倩坦言對這次漏低銀包事件會作自我檢討，其實她以前都曾發生不少烏龍事，一次她與好友吳君如往搭飛機，因隨身袋住的貴價潤膚霜容量超過規限，機場保安表示要沒收，她即與君如齊齊猛搽，搽剩三分之一才安樂。她亦曾分享，昔日錄影《歡樂今宵》的烏龍事，笑言曾換錯衫、發台瘟。

對於機場「銀包事件」一事俾網民公審，曾華倩回覆《蘋果》時，否認自己發爛渣，更反指斥噚晚喺機場遇到一個冇禮貎，兼且態度有問題嘅職員。「其實成件事就係我銀包放咗落阿仔個背囊入面，但佢入咗禁區我先醒起，當刻我衝去航空公司個櫃台，問職員有咩辦法，當時個人好徬徨，因為之前都未試過，都想問吓有冇人有呢個情況出現過。點知counter嗰度有個女職員就好冷漠咁話『冇㗎喎，我哋幫你唔到喎，呢啲係機管局安檢嘅問題，或者咁啦，當你個仔架飛機到境，咁佢咪可以去番入境大堂囉，但張機票就作廢啦，不過o依家飛機都就起飛，未必夠時間喎。』

「我唔明客人已經好着急，點解個職員仲會咁講嘢，根本唔係幫人，似係潑冷水多啲，其實佢做啲假動作，或者話『等我試吓』去安撫個客，成件事已經唔同晒。學劉德華話齋，今時今日咁嘅服務態度點得㗎，其實中間都有個男仔想起身話幫我試試，點知嗰位女職員即刻行埋嚟，個男仔就坐番低，所以個女職員應該係上司。」

華倩透露事後亦有搵入境署職員同警察幫手，但得出結果都係話安檢問題，叫華倩最好問番航空公司，最終銀包亦隨阿仔上咗飛機。華倩話本來件事喺噚晚已經告一段落，估唔到今朝瞓醒，竟然見到有人貼文將是非顛倒。「我唔明點解會有人寫啲咁刻薄嘅字眼去傷害人，亦再證明呢個世界上有好人同衰人，係邊個寫，自己心中有數，噚晚係半夜機，機場好少人，而噚晚遇到嘅，絕大部份都係好人……其實寫得出呢啲字眼，佢本身個人嘅人格都好有問題，自己對得住良心，都係嗰句，種善因得善果。」