# 20180302說服唔到自己52歲曾華倩拒演陳偉霆阿媽

>【蘋果日報】2018年03月02日

當年無綫「五虎」湯鎮業同「九龍女」曾華倩前晚喺大埔亞視碰頭，阿湯接受華倩主持嘅節目《今晚見》訪問，仲取笑曾經同梁朝偉拍拖嘅華倩：「因為華倩搵唔到梁朝偉、劉德華先搵我嚟。」華倩大發嬌嗔否認，仲爆阿湯花名「女人湯圓」還擊。 阿湯演慣爺爺 轉戰內地市場多年嘅阿湯，就慨嘆自己59歲要做爺爺角色：「依家內地做演員，可能3、40歲叫你做爹哋，6、70歲叫你做老爺，所以自己喺內地好多角色都做老爺。」52歲嘅華倩即刻有感而發：「之前內地有角色叫我做媽咪，做媽咪冇問題，但製作單位話個仔係陳偉霆，自己諗吓覺得有啲接受唔到，因為陳偉霆只係二仔，仲有個大仔喎！」 現實中華倩嘅兒子只得19歲，佢真係接受唔到做32歲陳偉霆嘅媽咪：「製作單位同我傾錢，我話唔好講錢住，自己真係唔好意思，因為諗到個畫面，說服唔到自己！」

> 東方日報 2018年3月2日 (五)

藝人湯鎮業前晚到亞視錄影由曾華倩、朱慧敏、樂瞳等主持的節目《今晚見》，華倩笑言可能會在節目中爆湯鎮業的秘密，朱慧敏則謂會向對方了解在內地工作的情況。

問到會否為亞視拍劇，湯鎮業表示要看劇本，華倩即表示想與湯鎮業的兒子合作，他笑說：「佢想食吓啲『小鮮肉』！」華倩聞言即說：「如果係冇所謂，拍戲之嘛！」並透露有內地片商找她飾演陳偉霆的母親，但被她拒絕，華倩說：「因為說服唔到自己。」

那些年無綫「五虎」湯鎮業同「九龍女」曾華倩，噚晚喺大埔亞視碰頭啦，阿湯接受華倩、朱慧敏同樂瞳主持節目《今晚見》訪問，阿湯就笑曾經同梁朝偉三合三離嘅華倩，佢話：「因為華倩搵唔到梁朝偉、劉德華先搵我嚟，因為我好好人。」華倩即爆阿湯花名「女人湯丸」還擊：「唔係呀，唔好聽佢講，不過佢都好好人，佢o依家喺大陸好忙，專登返香港接受訪問，平時佢口不對心，但對人好好，所以有別號叫女人湯丸，我喺節目搓吓佢，睇吓佢有乜講。」

問到兩人係咪經常聯絡？華倩話：「耐唔耐都有聯絡，早幾年佢喺廣州做製作，搵我幫手做親子節目。」阿湯笑指今次係還人情：「所以今次幫番佢，人情一定要還，嗰時我哋做親子節目算係先河，o依家內地已經做到好厲害，節目搵錢搵得好犀利。」問華倩係咪想返大陸演出？阿湯推波助瀾話：「我睇得出佢都啱，o依家仔大咗，心態都唔同。」華倩承認目前狀態幾好：「想拍就拍，唔想拍就唔拍，舒服好多，覺得國內製作超越香港好多，都想見識下。」

阿湯冇再做製作，現時主要做幕前，原來59歲嘅阿湯已經要扮演爺爺角色：「可能三、四十歲叫你做爹地，六、七十歲叫你做老爺，所以自己喺大陸好多角色都做老爺。」52歲華倩即有感而發：「之前內地有角色叫我做媽咪，做媽咪冇問題，但製作單位話個仔係陳偉霆(32歲)，自己諗吓覺得有啲接受唔到，因為陳偉霆只係二仔，仲有個大仔喎！」

當製作單位想傾酬勞時，華倩落閘婉拒：「我話唔好講錢住，自己真係唔好意思，因為諗到個畫面，說服唔到自己，但私底下嗰句，係唔想俾錢動搖自己睇法，哈哈！。」阿湯慨嘆大陸演員實在太多：「可能你唔做，就好多人做，如果演80歲角色，搵80歲嘅人做，萬一佢身體有乜唔舒服，可能會影響進度，所以佢哋慣咗60歲演80歲，40歲演60歲，將年齡層演大咗啲。」

{{< galleryim >}}

<galleryim>
  <img src="https://file.qianying.zone/230815-b4b0cc.png" alt="Margie">
  <img src="https://file.qianying.zone/230818-905876.png" alt="Margie">
  <img src="https://file.qianying.zone/230819-781ed8.png" alt="Margie">
  <img src="https://file.qianying.zone/230819-5aa1a6.png" alt="Margie">
  <img src="https://file.qianying.zone/230819-acc371.png" alt="Margie">
  <img src="https://file.qianying.zone/230819-61c265.png" alt="Margie">
</galleryim>