# 20091202馬詩慧爆老公驚敷Mask


> 東方日報 2009-12-02

![右起：馬詩慧、曾華倩、朱慧珊及邱李茂琪在活動中碰頭](https://file.qianying.zone/230728-2012ee.png)

模特兒馬詩慧（Janet）昨日出席SK-II全球第二間概念店開幕，同場有曾華倩、Joceyln、朱慧珊、邱李茂琪等，育有兩女一子的Janet表示已開始教導女兒護膚之道，自覺女兒比自己幸福：「我哋以前細個冇人教，好多時都係聽人講，人哋話青瓜同檸檬好咪試吓，不過都有危機，好似檸檬如果敷得耐，會漂白咗某一個位，就好似白蝕咁。好在呢啲係天然嘢，唔會對皮膚有太大傷害，只要唔好用啲來歷不明嘅護膚品就得。」

問到丈夫王敏德是否也是貪靚之人？Janet指他並不姿整：「佢一世人只係喺外面敷過一次Mask，之後佢就驚咗，話覺得好有壓迫感。（佢唔出去外面做Mask，你咪好放心？）佢唔畀人整佢塊面，唔代表唔畀人整佢其他部位！」